MiniDisc

MiniDisc（ミニディスク，通常簡稱MD）係1992年由日本索尼公司發布嘅一種音樂光碟產品，佢使用咗磁碟同光碟技術，唔單止體積比CD細，而且操作方式同CD差唔多。

MD使用方式其實好簡單，佢通常只需要準備數碼光纖訊號線、模擬訊號線又或者係咪高峰連過去就可以進行錄音操作，如果想連接電腦嘅話就一定要用USB搞。

1984年10月，索尼成功推出手提CD機Discman之後，令啲人嘅聽歌方式更加方便，就連唱片公司所發行嘅專輯亦都開始出咗CD版本。Discman無論係操作方面定係聲音質素，都遠遠超過早期嘅卡式帶機。初時飛利浦打算同索尼繼續合作可替代嘅音樂產品，不過仲未成功。於是索尼用咗一年時間，成功研發出呢個全新嘅音響規格（由於MD嘅核心技術主要係出自早期嘅磁光技術；而且喺1980年代發表嘅軟碟同MO規格經已非常成熟）。

雖然索尼喺1992年5月開始推出第一部支援防震嘅Discman，不過佢個機身都幾大部（初頭只得3秒防震）。同年10月，索尼正式發佈第一部MD Walkman MZ-1同埋放音機MZ-2P，佢哋係頭一部搭載數碼光纖輸出同輸入嘅產品。

除咗日本之外，MD喺西方國家亦都幾流行，尤其香港係日本以外最多人使用MD產品嘅亞洲地區之一。唔單止索尼，包括松下、聲寶都有人用，尤其最醒目嘅EL綫控都有錄音撳掣，非常方便（可以顯示歌名、歌手名、曲目經過時間、總長度、唱碟名、錄音時間、錄音模式）。而且唱片公司出過嘅MD專輯響CD舖都有得賣，之不過呢啲嘢價錢好高亦都好少人儲錢買碟，所以推出一段時間就已經冇咗。

2000年代開始，由於方便下載嘅MP3數碼音樂格式快速冒起，亦令索尼再次發圍繼續推出NetMD同埋Hi-MD產品[1]。

錄音MD嘅曬士差唔多係2.5英吋，外表接近軟碟，光碟本身擺喺一個方型塑膠殼入面，下面有一粒防寫裝置，側面有一個Shutter。不過唱片公司賣嘅MD專輯同CD專輯一樣都係工廠整出嚟嘅，只可以聽，唔畀錄音。

MD本身以磁光效應（Magneto-optic Kerr effect）將檔案寫入TOC（table of contents），因此開始錄音嘅時候，光碟上面嘅磁性介質就會被加熱到居里點（Curie point）；即係話一個Track記錄完畢之後，就可以響下一個Track開始記錄，讀取放音嘅時候都一樣。

MD擁有卡式帶嘅錄音功能同埋CD嘅快速選曲播放，而且一隻MD碟至多可以記低255個Track Number，無論係上堂時間寫筆記、記者採訪、音樂Demo、私家收藏等等，因此人人都可以隨時隨地用佢補充所需要嘅嘢（又或者拎走唔需要嘅嘢），而且反覆編輯咁多次亦都影響唔到聲音質素。

MD使用索尼自主開發嘅ATRAC（Adaptive Transform Acoustic Coding）編碼，佢可以將一隻CD壓縮到原始檔案嘅五分之一。2000年所開發嘅ATRAC3技術係之前嘅兩倍（即係原始檔案嘅十分之一），如果用LP2模式至多可以記錄160分鐘，而用LP4可以記錄320分鐘。

MD主要係使用SCMS（Serial Copy Management System，序列複製管理系統）做版權保護嘅，即係話用咗過一次數碼錄音之後就唔可以進行相同方式記錄，不過模擬錄音就無呢個限制。

MD唔單止迫近CD音質，而且可以避免跳綫造成聲音中斷，一般嚟講就係利用緩衝儲存（Memory Buffer）完成快速讀取嘅動作；不過佢開機嘅時候至少需要6秒鐘左右嘅時間去讀碟，存取完畢之後，唱機摩打就會停止運作，令電池更慳電。

SONY MZ-1

空白MD碟

一隻MD畀拆開

一張MD專輯（正面）

一張MD專輯（背面）

SONY MZ-R35錄音機

SONY MZ-E35 MD Player正面

SONY MZ-E35 MD Player機械構造

原裝綫控

SHARP MD-MS701H

SONY MZ-N707 Net MD Walkman

SONY MZ-N920 Net MD Walkman