闲话老上海（六）“扬州饭店”搭仔“莫家菜”

原创 己丑老牛 海上梦叠

作者：己丑老牛

改写：郭莉

讲述：潘慧芳

文字、语音审核：丁迪蒙

编辑：王乙其

往期回顾： 礼拜日，我搭太太到南京东路去荡荡，勒勒福建路口，老底子杭州“知味观”饭店个地方，发现有了家“扬州饭店”。过去一问，原来伊就是从南京东路几经搬迁，现在到了此地个，顶顶正宗个“扬州饭店”。

进店落座，拿过菜谱来看，果然真个是道道地地“莫家菜”。因为只有两家头，吃勿脱几化，就点了一例水晶肴肉、一只红烧狮子头、一盆“炝虎尾”，还带了一笼蟹粉汤包。美味落肚，交关受用。所以，回来就写仔篇微博文章，想搭大家一道分享“莫家菜”个美味。

有年轻同事看了我个微博，勿晓得“莫家菜”是啥个讲法，跑来问我。葛末，就要从头说起了哦。

原来啊，“扬州饭店”本来并叫“扬州饭店”个，是叫“莫有财厨房”。我年轻辰光，晓得伊是开勒宁波路江西路伊面个，后首来搬到北京东路江西路口。迭家私人厨房，由扬州个名厨莫德峻，搭伊儿子莫有庚、莫有财、莫有源父子四个经营个，专门为上海滩浪荣毅仁、梅兰芳、俞振飞、周信芳咾啥一批海上名流服务，烧眼私房小菜。因为是老二莫有财出面解税，税单浪向个名字是“莫有财”，所以就叫“莫有财厨房”。

“莫家菜”里向，以鸡火干丝、清炖狮子头、八宝鸭、蜜汁火方、三丝鱼翅、拆骨大鱼头、炝虎尾、三套鸭、水晶肴肉、松仁鱼米、三色鱼丝等几十种维扬菜最出名。我搿趟点个几只菜，应该侪是最经典个“莫家菜”。其中“炝虎尾”，可能交关人勿晓得是啥，勿敢点。其实，伊就是用黄鳝背尾划丝，据说一斤黄鳝只好划出一两搿能个鳝丝，开水稍微烫一烫，再加各种料作。吃起来实在是滑嫩鲜美，让人叫绝。

后来个几十年里向，“莫有财厨房”改名叫“扬州饭店”，开到南京东路，名气越来越大了。改革开放了，莫有财还应邀到电视里向来教大家烧扬州菜。我当时也跟勒海学仔两只菜：一只叫“双色牡丹”，其实就是拿黑木耳白木耳发开，拌勒一道加调料，是只颜色好看个冷菜。还有只就是“炝虎尾”，我用个侪是一般个黄鳝丝，再加眼自家调配个料作，吃起来蛮乐胃个。

莫家兄弟应该侪八、九十岁朝上了，勿晓得是否还健在，祝伊拉长寿。更加要祝愿“莫家菜”能够永远传承下去。

朗读：潘慧芳

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《闲话老上海（六）“扬州饭店”搭仔“莫家菜”》

阅读原文