座標: 13°45′N 100°29′E / 13.750°N 100.483°E / 13.750; 100.483

泰王國（粵拼：taai3 wong4 gwok3；泰文：ราชอาณาจักรไทย，拉丁轉寫：Ratcha-anachak Thai，音標：[raːtˀ41 aː33 naː33 t͡ʃaːkˀ21 tʰaːi33]，模擬粵音：laat1 aa3 naa3 zaak6 taai3），簡稱泰國（ประเทศไทย，拉丁轉寫：Prathet Thai，音標：[prɐ21 tʰetˀ41 tʰaːi33]，模擬粵音：bra6 tet1 taai3），係東南亞嘅一個國家，東面係老撾同柬埔寨，南面係暹羅灣同馬來西亞，西接緬甸、安達曼海。喺1949年5月11號之前，泰國嘅正式名係暹羅（暹讀僭，cim3 lo4；สยาม，拉丁轉寫：Sayam，音標：[sjaːm114]，模擬粵音：si3 jaam5）。

正式個名：ราชอาณาจักรไทย，ราช係「國王」、อาณาจักร係「領土」、ไทย係「自由」（讀音如「泰」），所以譯泰國。當地俗稱：เมืองไทย。

英文嘅全名寫法：The Kingdom of Thailand，簡寫：Thailand。

舊國名暹羅，英文爲Siam。

泰國憲法寫國行君主立憲制，國王冇咩實際嘅權力，國王本人，代表泰國同埋完整統一。而政府嘅首腦就係總理，由國王指定，一般都係由議會嘅聯合政府多數派黨嘅領袖擔任。

泰國國會由兩院組成：眾議院有五百席，參議院有二百五十席。眾議院議員係由國民選出嚟。眾議院議員每屆任期最長四年，參議院議員就係五年。最高司法機關就係最高法院，成員係由國王指定。

泰國係東南亞國家聯盟嘅成員。

雖然泰國並冇明文聲明，但實際上佛教嘅地位等同國教。泰國嘅佛教傳統主要係上座部佛教，或者稱為原始佛教，屬於南傳佛教。另外少數嘅宗教或佛教流派係大乘佛教、回教、天主教。

因為佛教喺泰國嘅崇高地位，所以泰國係亞洲三個佛教國家之一。

除咗上座部嘅傳承之外，百幾年前嘅華人移民亦形成咗所謂嘅華僧宗，喺泰國亦有相當影響力。除咗華僧宗，重有越南人形成嘅越僧宗。

泰國作為一個相當多禮儀嘅國家，即使係國王都要向僧眾表示尊敬。所有人到寺廟參拜同拜見僧人都要符合一定嘅禮節，否則可能受到處分。

同柬埔寨、斯里蘭卡相似，泰國亦有佢哋稱之為僧王嘅佛教最高領袖。所有泰國佛教僧都係嚮泰國僧王管轄之下。

每年一度嘅衛塞節係泰國重要節日之一，係上座部佛教紀念佛祖誕生、成道、涅槃嘅日子。該節日已經俾聯合國認定。

首都曼谷，分為五十個區（เขต，Khet）。曼谷外劃分七十五府（จังหวัด，Chiangwat），每一個府都係用府裏邊最大嘅城市個名作為府名。各府下分為「區」（อำเภอ，Amphoe）同埋「次區」（กิ่งอำเภอ，King Amphoe）