青茂口岸

青茂口岸（又叫：粵澳新通道；葡萄牙文：Posto Fronteiriço de Qingmao、英文：Qingmao Port）係中華人民共和國一個地區性嘅陸路邊境口岸，喺廣東省珠海市香洲區，連接澳門青洲區同城軌珠海站兩地，定位係獨立開放嘅信息化電子口岸，設計每日通關流量係20萬人次，以自助通關為主，淨係畀行人通行，冇車輛通道。跨越粵澳兩地，佔地面積大約28,000平方米。主要建設用地同建設內容喺澳門，少量設施架設喺鴨涌河上面[1]。

青茂口岸澳門邊檢大樓（葡萄牙文：Edifício Posto Fronteiriço de Macau do Posto Fronteiriço Qingmao、英文：Qingmao Port-Macau Frontier Post Building）係澳門特別行政區同廣東省珠海市第五條陸路跨境通道，實行24小時通關，即係將會成為第二個珠澳兩地全天候開放嘅正式口岸。邊檢大樓係繼港珠澳大橋澳門邊檢大樓同橫琴口岸澳門口岸區之後，第三個往返珠澳嘅出入境口岸採用「合作查驗，一次放行」嘅通關模式，旅客出境時會先接受澳方保安人員安全檢查先可以通過關檢區域，最後接受雙方人員證件查驗；而入境方面亦採取呢種方式。

國務院副總理汪洋喺2013年11月初訪澳期間，正式宣佈呢項項目已獲得中央批准同意建設。

粵澳新通道設置嘅新口岸將共用一個名，實施「合作查驗，一次放行」嘅通關模式。新通道口岸定位係僅供行人通行嘅電子自助專用口岸，實施全日24小時通關。

鴨涌河上起大約400米長嘅全封閉旅客過境專用通道，實現廣珠城軌同澳門輕軌嘅便捷對接。綜合治理鴨涌河，將佢打造成為一河兩岸嘅生態景觀長廊。建設集出入境聯檢大樓、輕軌站、巴士換乘站、的士站、停車場、公共房屋、社區設施、會展場地、配套設施同經濟型酒店於一身嘅綜合建築群。

青茂口岸工程由2019年6月11號開始獲准每日施工，工作時間係朝早8點至夜晚10點，直至同年12月31號，星期日同公眾假期亦唔例外。呢個工程包括青茂口岸聯檢大樓、連接通道同鴨涌河綜合整治工程[2]。

2020年11月16號，行政長官賀一誠發表2021年財政年度施政報告，表示青茂口岸喺2021年啟用[3]。

交通事務局話，青茂口岸周邊設有公共巴士站，將佢周邊現有嘅巴士站將會設多個分流站點分流乘客來往口岸。

青洲坊 ↺ 皇朝（循環線）

青洲坊 ↺ 氹仔中央公園（循環線）

青洲坊 ↔ 海洋花園瞭望台

牧場街 ↺ 下環街市（循環線）

牧場街 ↺ 媽閣（循環線）

[4]。

喺青茂口岸起緊期間，珠澳偷渡團伙利用工程建設漏洞非法偷渡進入澳門，珠澳兩地警方雖然經過聯合採取行動但係成效唔顯著。甚至有澳門本地媒體將工程期間嘅偷渡常態叫做「粵澳偷渡新通道」。